إنســـانيــات .. نحـو عـلم اجـتماعى نـقدى

منتدى دار إنسـانيات للبحوث والنشر
 
الرئيسيةس .و .جبحـثالأعضاءالمجموعاتالتسجيلدخول

شاطر | 
 

 من روائع الشاعر الجميل على سلامه

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
د. فرغلى هارون
المدير العـام

avatar

ذكر عدد الرسائل : 3278
تاريخ التسجيل : 07/05/2008

مُساهمةموضوع: من روائع الشاعر الجميل على سلامه   16/3/2010, 12:52 am



على سلامة شاعر مصرى , ولد وتربى فى حى السيدة زينب بمصر 1960 درس الهندسة لكنة كان يتردد على قصر ثقافة الغورى مما ساعد على تكوين موهبتة الشعرية هو لا يدعى أنة من شعراء المعلقات أو أنه من اعظم شعراء هذا العصر , لكنة يدعى انة مواطن شاعر شاعر بالابيات شاعر بأحاسيس المواطن.
احيانا يظهر الاكتئاب والحزن واحيانا يظهر التفاؤل والامل ابتسامة دهشة إعجاب تساؤل كلها ردود أفعال قد تراودك عندما تقرأ قصيدة واحدة لعلى سلامة. تأثر على سلامة فى شعرة بصلاح جاهين وبديع خيرى وبيرم التونسى



من أشعار على سلامه



الضَرَيبة
مش غريبة ..
ندفع الأوجاع ضريبة ..
قَسَّمى الأحزان شرايح ..
عبَّى دمعى ف الصفايح ..
واسألى عمرى اللى رايح ..
المصيبة
لسة شايلك فى العيون أجمل حبيبة ..
قولى كذبة ..
حُبى ليكى يبقى حسبة ..
والأمانى والهوا ..
والشوق بنسبة ..
وإنتى عزبة ..
للى مالُه فيكى حِسبة ..
المُصيبة ..
لِسة شايلك فى العيون ..
أجمل حبيبة ..
مين اللى قرر ..
يقتل الحلم .. فى عيون كُل الطيور ..
ليه تسلَّمينى ..
من طابور .. تانى لطابور ..
قَيَدّى البخور ..
بركات جراحنا المزمنة ..
كل الأمانى الممكنة ..
تبقى يادوبك دمعتين ..
فوق صورة باهتة ملونة ..
سايبة الجراح ليه تهدنى ..
إيه فيكى تانى يشدنى ..
ده أنا اللى حُبى عززك ..
وإنتى اللى عشقك ذلَّنى ..
لسه ياهبلة بتسألى ..
بتحبنى ..
نفسى اشترى ..
شبرين فى حضنك وارتوى ..
فكرك مسافر أغتنى ..
خدى اللى حيلتى ..
الهدمتين والقرشينات ..
بس استُرى عرض البنات ..
لو حسينا على دمنا ..فى قلوبنا مات ..
لو بكرة فات ..
وإحنا بياكلنا السُكات ..
كُل الأمانى الممكنة ..
تبقى يادوبك دمعتين ..
فوق صورة باهتة ملونة



البنت بنتى
حنينة وآخر لماضة..
غصب عنها
بقت بليدة فى التاريخ
وغصب عنها برضه
شاطرة فى الرياضة..
بنت أبوها
بس لما يبكى أخوها
تبقى أم..
وتبقى أخت..
وتبقى دادة..
ولما أخاصم أمها
بتستلم هى القيادة..
تيجى جنبى وتلاغينى
كأنى طفل
وأمى قاعدة بتدادينى
بابا تشرب شاى معايا
ولاّ أحكى لك حكاية
حضرتك..
قهوتك مظبوطة
ولا تحبها سكر زيادة..
ولما تقلب كل حاجة
فى كل حاجة
كلنا نضحك ونرجع
نملا تانى البيت سعادة..



صالة السفر
من كتر مالحزن بقي..
ف دمنا..
حتي ف غنانا والسهر..
بقت بتتساوي الحاجات..
صالة الوصول..
تشبه تمام صالة السفر..
بنادي ع القبح نقوله..
يا عسل..
يا سكر إنت يا قمر..
والموت بقي مجرد خبر..
عارف..
رغم احتياجي للفرح..
لكني بتلخبط أوي..
لو دق بابي بدون سبب..
وبدون شروط..
أبقي نفسي أعيش كمان..
مليون سنة..
وأقول ياريت دلوقتي أموت..
معقول بقيت بخاف كمان..
من الفرح..
وم الأمل..
وم الهدوء..
وأقلق وأقول..
يا هل تري إيه مستخبي..
وإيه اللي جاي بعد السكوت..
عارف..
لو كل الحاجات الحلوة..
كان مسموح لها..
وتقدر تفوت..
لو كان حقيقي ده وطن..
مش مجرد مساحة ع الخريطة..
وناس وزحمة وشوية بيوت..
عمري يوم ما كنت أخاف م الفرح..
لو دق بابي..



خايف أصحى مالاقيش مصر
ساعات بقلق بالليل
يعني بالليل شوية كده
قبل الفجر
حسب الظروف كده
بعد العصر
خايف يوم أصحي
وأفتح الشباك
مالاقيش مصر
ألاقيها لمت هدومها ومشيت
لمت هدومها
علي نيلها
علي هرمها
وطفشت
وحلفت ميت يمين ماهي قاعدلنا
ماهي زهقت
تعبت
إتخنقت
أصلنا زودناها
أكننا استعمرناها
ورثناها
مصر البنوتة الحلوة
اللي زي القمر
بقت عجوزة وشايبة
وبان عليها الكبر
خايف يوم أصحي
وأفتح الشباك
مالاقيش مصر



أنا المواطن نقط
أنا المواطن نقط نقط نقط
ولا بتهان وأسكت زى زمان
أنا بصرخ وأكتب وأبعت وأتكلم
وأسمع بقى يا معلم
أنا المواطن نقط نقط نقط
رقم قومى نقط نقط نقط
محل الأقامة نقط نقط نقط
بجوار البنزينة
بصراحة حرام تعملوا فينا نقط نقط نقط
وتطلعوا نقط ونقط أهالينا
عملتوا انتخابات وكلها نقط نقط نقط
وشيلتوا وحطيتوا حاجات نقط نقط نقط
بصراحة أنا بقيت قدام مراتى حاسس انى مش نقط خالص
وأقولها نفسى أبقى نقط بجد
تقولى يا اخويا ماتحرقش دمك
محدش بينفع حد
حسك ف الدنيا بكرة تبقى نقط نقط نقط ....!!!



ثقافــة
فيه ناس لما تضايق
تملا البانيو وشوية بخور
وشمع ومزيكا واغاني
أو تروح تحكي
وتاخد وتدي
مع طبيب نفساني
أو تطلع شرم الشيخ تاني
ودي ثقافة ..
وفيه ناس لما تتخنق
ترجع تقلب ف اللي فات
وتجيب الصور والذكريات
وتاخد جوافة وبلح أمهات
وتروح تزور الميتين
ف القرافة
ودي ثقافة ..
وناس تلم العيال
وربع لب ونص سوداني
وفيلم قديم لإسماعيل ياسين
أو نجيب الريحاني
أو تعدي ع الحلواني
وكيلو مشكل
وتكتر الكنافة
ودي برضه ثقافة ..
والكل مجروح
ونفسه يبوح
بس مش عارف



معرفـــــش ليـــــه
معرفش ليه
تنّحت للدنيا كده
فجأة لقيتني مسكون بالملل
لا عندي رغبة في البكا
ولا في الكلام
ولا عارف أنام
ولا حتى بسأل إيه ده إيه
و أخرتها إيه
و إيه العمل
و أخاف أقول لأي حد
أحسن يقوم يقلبها جد
حد صاحبي ينزعج
يمد إيده في قلبه من باب الكرم
عشان يشاركني الألم
أو يستلفلي من لئيم حبّة أمل
حالة كده
معرفش إيه
حالة كده ملهاش معالم
ساعات تزورني في الربيع
في الحر
و في عز الشتا
و تجيب حاجات لا فيها روح ولا ميتة
لكني برجع منّها بعد السكات
فاهم شوية في اللي فات
حاسس قوي بحزن الصحاب
محظوظ أنا
ساعات أشاور ينفتحلي ألف باب
لكنّي بغلط في الحساب
معرفش ليه



أسكـــــت يــــــاد
قولي يا عبد الجواد
مش إحنا الشعب
وده مثبوت في البطاقة
ومكتوب ف شهادة الميلاد
ولا مصر خلفت ولاد غير الولاد
طيب ليه
كل ما اتكلم واستخدم حقي
يقولولي اسكت ياد
سنين ساكنين
في نفس الحتة الضيقة
نفس الهوا
ونفس الدوا
ونفس الأمراض
على فكرة
مفيش جبنة في التلاجة
ولا خيار
ولا أعياد
مفيش غير فيلم قديم
كل شوية بيتعاد


ــــــــــــــــــــــــــــــــــــــــــــــــــــــ
قربت أموت

بانده عليكى بأعلى صوت

دفينى بحنانك لاموت

بانده ولا بيجينى صوت

ما تردى يا امه بنظره حتى من عنيكى

د. فـرغلى هــارون
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://social.subject-line.com
 
من روائع الشاعر الجميل على سلامه
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
إنســـانيــات .. نحـو عـلم اجـتماعى نـقدى :: 
منتدى الخدمات العامة لجميع الباحثين
 :: 
قضــــايا ومنــاقـشــــات فى كل المجالات
-
انتقل الى: